Compartimos coche ye una iniciativa del Ayuntamientu de Samartín del Rei Aurelio, sofitada pola Conseyería d’Industria y Emplegu, que tien como propósitu facilitar l’usu en comuña del coche por motivos llaborales o d’estudiu, col oxetu d’amenorgar costos a la ciudadanía, menguar les emisiones de CO2 a l’atmósfera y ameyorar la calidá de vida de les ciudaes ensin dexar a un llau la movilidá y el modelu de tresporte. Del mesmu mou, náguase por promover un desarrollu urbanu sostenible y baxar los costos del usu del vehículu, como son combustible, mantenimientu o aparcamientu, dando puxu, en resume, a un usu racional y eficiente del tresporte priváu.

La iniciativa surde cuando dende’l Serviciu d’Emplegu de Samartín del Rei Aurelio se decataron d’una resistencia a movese fuera del conceyu pa trabayar, principalmente polos motivos que siguen darréu:
 

• Tradición a trabayar cerca de casa.
• El viaxe supón un costu que reduz la renta salarial.
• Esisten dificultaes d’accesu con tresporte públicu.
• Implica una dedicación de tiempu.

Como consecuencia d’esa resistencia a movese los desemplegaos
del conceyu pierden la oportunidá d’acceder a un emplegu fuera d’esti. Con esta iniciativa facilítense los tresllaos por motivos de trabayu fuera del conceyu, contribuyendo a crear emplegu y calteniendo la residencia en Samartín del Rei Aurelio.

Complementando la idea principal sobre la que surde esti proyectu dase llugar tamién a nuevos servicios d’usu compartíu dientro d’esta web, rellacionaos cola cultura, l’entretenimientu y el tiempu llibre, asina como un bancu de tiempu y un blog.